А.А. Аккузовтың «Ана тілінің мәйегі – бастауыш мектепте» тақырыбындағы ашық сабағы

Мектепке дейінгі және бастауыш білім беру кафедрасының филология ғылымдарының кандидаты, қауымдастырылған профессор А.А. Аккузовтың ұйымдастыруымен «Ана тілінің мәйегі – бастауыш мектепте» тақырыбында ашық сабақ өткізілді.

Ашық сабақтың негізгі мақсаты – студенттердің ана тіліне деген құрметі мен сүйіспеншілігін арттыру, тілдің қоғамдағы және рухани дамудағы рөлін терең түсіндіру, сондай-ақ тілдік құзыреттілігін жетілдіру болды. Сонымен қатар болашақ бастауыш сынып мұғалімдерінің кәсіби шеберлігін арттыру және педагогикалық әдіс-тәсілдерді тиімді қолдануға бағыт беру көзделді.

Сабақ барысында заманауи педагогикалық технологиялар кеңінен қолданылды. Интерактивті әдістер, топтық және жұптық жұмыс, проблемалық сұрақтар мен шығармашылық тапсырмалар студенттердің белсенділігін арттырды. Қатысушылар өз ойларын еркін жеткізіп, пікір алмасу жүргізді.

Әдістемелік бөлімде тақырыптың өзектілігі жан-жақты қарастырылып, ана тілін бастауыш мектепте оқытудың мазмұны мен әдістемелік ерекшеліктері талданды. Оқытушы оқыту принциптері мен талаптарын түсіндіріп, оларды жүзеге асырудың тиімді жолдарын ұсынды. Сонымен қатар отандық және шетелдік ғалымдардың еңбектеріне шолу жасалды.

Сабақ барысында мәтіндік талдау жұмыстары орындалып, студенттердің сыни ойлау қабілетін дамытуға бағытталған тапсырмалар берілді. Практикалық бөлімде тілдік дағдыларды жетілдіру және бірлесіп жұмыс істеу дағдылары қалыптастырылды.

Сабаққа қатысқан әдіскер-оқытушылар мен тәжірибелі ұстаздар оның құрылымы мен мазмұнын жоғары бағалап, студенттердің белсенділігі мен қызығушылығының жоғары болғанын атап өтті. Пікір алмасу және сұрақ-жауап кезеңдері тиімді ұйымдастырылды.

Жалпы, ашық сабақ болашақ педагогтардың кәсіби дамуына оң ықпал етіп, теориялық білім мен практиканы ұштастыруға мүмкіндік берді. Мұндай іс-шаралар студенттердің шығармашылық қабілетін дамытып, педагогикалық шеберлігін жетілдіруге ықпал етеді.